चारोळ्या - वारकरी

आपल्या सगळ्यांच्याच मनात असतो
एक वारकरी लपलेला,

वरून कितीही आव आणला, 

तरी भक्तीत बुड़ालेला...

काटेकोर वागणारा,सुधारलेला - पुढारलेला.

पण मनातल्या विठूच्या प्रेमात रमलेला !

तुळशीची माळ न घालताच, 

अदृष्य वारीला चाललेला !!

©सुजाता मोघे

अजब हा भक्तीभाव 

ना कुणी थोर अथवा लहान 

कशाला ऊन पावसाची पर्वा 

विठूरायाच्या भेटीची अोढ सर्वा 

अखंड चालती पाऊले सारी 

हीच जगावेगळी पंढरीची वारी

©वैशाली गोडबोले

आयुष्याच्या 'वारी'मध्ये 

सोळा कलांचे वाजावे  टाळ 

रहावे सभान सजग

कधी सोडू नये ताळ||

          

©स्मिता शेखर कोरडे

         

निरागस मनाची पाटी असावी कोरी 

प्रेमाने भरावी ह्रदयाची झारी,

पंढरपूर असेल मग आपल्याच घरी,

सुंदर आणि आनंदी होईल आयुष्याची वारी!!

----------------------------------------------------------------------------

 वारकरी दंग त्यासी 

 . . . . . . . . विठूचा हो संग,

विठूचा तरंग

 .   . . . . विठूचाच रंग,

वितळला सारा जंग,

 .    . स्वये झाला हो अभंग!!!

------------------------------------------

पाई पाई करत वारी 

गेलो पंढरपूरात,

तर नव्हता देव राउळात!

म्हटल देवा असा काउन 

केला घात?

तर देव म्हने अबे,

"मी तर व्होतो तुझ्याच ह्रदयात!!!

© अनुराधा रानडे