Uri: The Surgical Strike - पोवाडा

अतिरेकी काढू ठेचून, संधी साधून

बोचतो भ्याड हल्ला मनात

बंधुबलिदान ठेवा ध्यानात

देशनेतृत्व वदले जोशात ॥

(जी जी जी जी जी जी)

इतिहास काय सांगतो

गोरी कपटनीती दावतो

खंडित देश पेटतो

शत्रू सैन्य सदा घुसवतो ।

रक्षण्या वीर झुंजतो

संगरी रक्त सांडतो

रिपुडाव कुटिल रंगतो

अश्वत्थामा मनी जागतो ।

भीषण काळरातीला, घाला घातला

संधी ना मिळे लढाईला

घडे थेट भेट मृत्युला

थोर आकांत “उरी” मांडला ॥

(जी जी जी जी जी जी)

हे अधम कृत्य अतिहीन

मार्ग एकच निर्दालन

चर्चा-दबाव सारे गौण

व्हावे तांडव शिवनर्तन ।

सत्तेचे लाभे वरदान

उठे सैन्यशक्ती पेटून

तोच ध्यास रात्रंदिन

लक्ष्य अमुचे अरिमर्दन ।

पावून योग्य समयाला, वार हो केला

उडे शत्रूची दाणादाण

जाहले ईप्सित अरिशिरकाण

झुंजले मर्द वीर बेभान ॥

(जी जी जी जी जी जी)

घेतला खरा प्रतिशोध

शत्रूस बैसला धाक

विझवता मनीची आग

स्वत्त्वास आली हो जाग ।

नेतृत्व असे जर “खासे”

उजळेल भाग्य देशाचे

जाणून मर्म हक्काचे

करू पुण्यकर्म दानाचे ।

सरकार यावे निवडून, कौल देऊन

जनांचा असे खरा आधार

संपवू कलंक स्वैराचार

प्रगतीचे स्वप्न करू साकार ॥

(जी जी जी जी जी जी)

ऑडिओ ऐकण्यासाठी इथे क्लिक करा: URI - पोवाडा ऑडिओ

मानसी फडके