'कला' ह्या शब्दाचा अचूक अर्थ देणे जरा अवघड आहे. एखाद्याला चित्रकलेची आवड असते तर एखाद्याला शिल्पकलेची. अशा अनेक प्रकारच्या कला आहेत. जे काही आपण मनोभावे करतो किंवा ज्या माध्यमातून आपल्या भावना व्यक्त करतो, त्यातूनच कला निर्माण होते. कागदाचे तुकडे जोडून कोलाज केले जाते, दगड तोडून किंवा तासून शिल्प तयार होते तसेच टाईल्सचे किंवा दगडांचे तुकडे करून ते पुन्हा आकर्षक रीत्या जोडून mosaic तयार होते.
आमच्या मोझाईक क्लासच्या शिक्षिका, लिओनी ब्राउन, एक पालकच होत्या. आॅस्ट्रेलियात ही कला शिकून त्यांनी खूप काही वस्तू बनविल्या होत्या. त्या वस्तू बघून खूप उत्साह आला. त्यांनी आम्हाला एक गोल, लाकडी लेझी सुझन दिले. लेझी सुझन डायनिंग टेबलावर ठेवता येते. साधारण १५ इंच डायमीटरचे. जे अशा वस्तू करायला खूपच उपयुक्त साधन ठरते. आपण कसले डिझाईन करावे हा विचार मनात आला. माझे भारतीय मन जागृत झाले आणि मी वारली डिझाईन तयार करायचे ठरविले. लिओनीने काचेच्या टाईल्स कापायला शिकविले आणि टाईल्सचे रंग निवडून हळू हळू लेझी सुझनवर त्या टाईल्स चिकटवून डिझाईन तयार केले. क्लासला आलेल्या इतर पालकांच्या ओळखी झाल्या. कोणी आयरिश, कोणी ब्राझिलियन, कोणी फ्रेंच तर कोणी मलेशियन अशा मैत्रिणी झाल्या.
शेवटच्या दिवशी त्या टाईल्सवर ग्राउटींग केले. ग्राउटींगची पावडर तयार मिळते. त्यात पाणी मिसळून त्याचा टाईल्सवर थर लावायचा आणि नंतर ते मऊ फडक्याने,अलगद पुसून घ्याय्चे. बघता बघता टाईल्समधली रिकामी जागा ग्राऊटने भरली जाते आणि आपले डिझाईन सुंदर दिसू लागते. टाईल्स काचेच्या असल्याने त्या चमकतात. असे तयार होते मोझाईक .
-- सौ. वंदना ढेकणे
No comments:
Post a Comment