गोष्ट वटसावित्रीच्या पूजेची

गोष्ट सांगते ऐका, एका वटसावित्रीच्या पूजेची

अहो, गोष्ट सांगते ऐका, एका वटसावित्रीच्या पूजेची|

नववधूच्या पहिल्या-वहिल्या वर्षाच्या पूजेची,

साथ होती ज्याला आम्हा मैत्रिणींच्या प्रेमाची|

जमायची वेळ होती बाराच्या ठोक्याची,

अगदी अस्सल सरदारजीच्या टाईमची|

नटून-थटून साऱ्या साळकाया-माळकाया,

जमलो होतो एकीच्या घरी|

पूजेची झाली जय्यत तयारी, अहो पूजेची झाली जय्यत तयारी

अहो, पुढील गम्मत-जम्मत काय सांगू तुम्हाला,

वेगवेगळ्या जणींच्या वेगवेगळ्या तऱ्हा,

पाहायला मिळतील आज तुम्हाला|

कुणी आशीर्वादाची फुले वेचिली वाकून,

तर कुणी बत्तीशीचे दर्शन दिले दात दाखवून|

अहो, एकीने तर चक्क आम्हाला

साक्षात वडाचे वृक्षही दिले दाखवून|

पण ह्या सर्वांमध्ये एक होती एव्हरग्रीन

बाकी मात्र सगळ्या होत्या ब्युटीक्वीन|

अशा या सुरेल वातावरणात कशी झाली असेल पूजा,

या सर्वांची नुसतीच कल्पना करा आता|

हळदकुंकू वाहून झाले, प्रदक्षिणाही घालून झाल्या,

मनोभावे पूजा-आरतीही झाली, 
अहो, खरी गम्मत तर पुढे आली|
पूजेच्या नावाखाली या बायकांनी कशी धमाल केली|

कुणी आणली खिचडी, तर कुणी व्हेपर्स वडे,

कुणी आणली रसाळ फळे तर कुणी कोशिंबीर-पेढे|

या सर्वात भर पडली बासुंदी आणि नारळ वडीची,

अहो, काय काय म्हणून सांगू तुम्हाला कथा या बायकांची|

हास्य हे आम्हा मैत्रिणींचे माहेरघर,

हसण्याच्या उधाणाने दणाणले मैत्रिणीचे घर|

अहो, ह्या वयात हीच तर एकमेव गुरुकिल्ली आहे

आमच्या जगण्याची, मैत्रीचे नाते जपण्याची

स्वतःला एव्हरग्रीन ठेवण्याची|

अहो, बघताय काय असे माझ्याकडे,

गम्मत नाही करत मी

whatsappच्या ग्रुपवर पहिले

आजच याचे प्रुफ मी|

सावित्रीला नमन करून या सर्वच शेवट केला गोड

अशीच आनंदमयी वट-पोर्णिमा, आम्हाला दरवर्षी घडू दे, असाच साक्षात्कार आम्हा मैत्रिणीना लाभू दे

हेच मागणे तुझ्याकडे आमचे, सावित्री, हेच मागणे तुझ्याकडे आमचे|

-- सौ. किशोरी नालटे