उत्सव

वर्षातून एकदा घेतात
             लुकलुकणाऱ्या  दिव्याची  जागा
              असंख्य दीपाच्या ओळी
आणि लपायला जागा शोधताना  अंधाराच्या नाकीनऊ येतात !

वर्षातून एकदा घेतात
               आकाशातील क्षीण ताऱ्यांची  जागा
                भव्य दिव्य  तेजाळ आकाशकंदील
आणि खेडयातील  एकाकी कंदिलानाही  आनंदाचे धुमारे फुटतात !

वर्षातून एकदा येतात
               नरकासुर  आणि  सोळा सहस्त्रजणींच्या साऱ्यांना आठवणी
                गोलपिठातील काही क्षीण नजरा मात्र
                आशेने नेहमी आकाशाकडे तिक्षत
                सुदर्शन चक्राची प्रतीक्षा करत असतात !

वर्षातून एकदा पेटतात
                खुज्या निराश झोपडयामध्ये  आशेच्या पणत्या
                 एरवी त्यांच्यात तेवणाऱ्या  इवल्याश्या चिमणीमुळे
                 प्रकाश अंधाराचे श्रावण वर्षभर बरसत असतात !

वर्षातून एकदा ओवाळतात

        बहिणी भावाला आणि पत्नी पतीला

        पण मानवी संबंधाच्या क्रूर ज्वाला आणि

        हुंडाबळींचे वणवे पाहून दिवेही ओशाळतात

        आणि शरमेने वर्षभर तोंड लपवतात!

- - डॉ. सुनील देशपांडे